MCIA Terminal 2 sugdan na

CEBU, Philippines – Sa dili madugay hingpit na unyang matukod ang Iconic International Terminal 2 sa Mactan Cebu International Airport ug gipaabot nga mahimo kining operational sa tuig 2018.

Kagahapon gipahigayon ang Concrete Pouring Ceremony nga personal nga gitambungan ni Department of Transportation and Communications Secretary Jose Emilio Abaya, Lapu-Lapu City Mayor Paz Radaza ug kadagkuan sa GMR-Megawide Corp.

Si GMR-Megawide Cebu Airport Corp. president Manuel Louie Ferrer niasoy nga kung makompleto na ang katukuran sa Terminal 2 ang kapasidad sa pasahero mosaka gikan sa 4.5 milyones ngadto na sa 12.5 milyones matag   tuig.

Kini ang labing unang airport nga gipaubos sa Private-Public Partnership (PPP) tumong sa paghimong world class airport ug venue alang sa economic growth.

Si Abaya sa iyang bahin nihulagway nga ang Concrete Pouring Ceremony usa ka importanteng kalihukan tungod kay dinhi natapos ang obligasyon sa nasudnong kagamhanan human ila na kini hingpit nga gi-turnover ngadto sa GMR-Megawide alang na sa dugang kalambuan sa MCIA.

Nagkanayon si Abaya nga human gipatuman ang PPP dako na kaayo og kausaban ang MCIA maong nagplano kini sa pagpatuman usab sa PPP sa mga tugpahanan sa lima ka lugar sa Pilipinas sama sa Panglao, Bohol; Iloilo, Bacolod, Davao ug Laguindingan Airport sa Cagayan de Oro City.

Subay sa katukuran sa bag-ong terminal, gibana-bana nga dos mil ngadto na sa tres mil ang makatrabaho.

Ang katukuran sa Terminal 2 sa MCIA na-award niadtong Abril 2014 ug nidumala ang GMR-Megawide Corporation niadtong Nobiyembre sa samang tuig diin ang proyekto nagkantidad og P17.5 bilyones.

Ang ground breaking   sa Terminal 2 gihimo niadto’ng Hunyo 29, 2015 nga gitambungan ni Presidente Benigno Aquino III. – /GMR) (BANAT NEWS)