Nganong kami man pasanginlan?– Davide

CEBU, Philippines – Si Gobernador Hilario Davide III nasuko sa pasangil nga ang grupo sa Liberal Party maoy mi-boo sa bise presidente sa nasud nga si Jejomar Binay niadtong Domingo.

Sama sa ubang politiko nga mitambong sa pagsaulog sa Sinulog, si Binay ug ang iyang running mate nga si Senador Gregorio Honasan uban kang suspended mayor Michael Rama diha sa grand stand sa City Sports Center atol sa pagbukas sa Sinulog Grand Parade.

Ang ubang tawo nga mitambong sa kalihukan diha sa CCSC mi-boo kang Binay dihang mitimbaya kini sa pag-ingon “Maayong buntag sa inyong tanan. Viva Pit Senyor!” Giingong si Rama kinsa maoy chairman sa Sinulog Foundation ang miaghat kang Binay nga pasultihon sa entablado.

Ang grupo sa LP kinsa giingong uban nila ni Davide ug Bise Gobernador Agnes Magpale giingong maoy gipasanginlan nga maoy mi-boo kang Binay.

Apan si Davide kagahapon nasuko sa maong pasangil ug matud niya nga iresponsable  kaayo ang mipasangil kanila.

“Pataka ra man na sila og sulti, mabaw kaayo, very reckless very irresponsible ang mga tawo ray nakahibawo ana uy…. Wa man gani ko didto sa grandstand diri man mi sa gawas nag-andam mi sa pagpaso,” ni Davide pa. Matud usab niya nga gisultihan na lang siya ni Magpale sa nahitabo.

Matud usab sa gobernador nga posibleng ang mga tawo diha sa lugar nakahibawo na nga wala itugot nga gamiton ang okasyon sa pagpangampaniya o pagpamolitika. – /EIM) (BANAT NEWS)