Apartment nasunog, mall hapit sab

CEBU, Philippines - Naangol ang tenant samtang duha ka iro ang naluwas sa mga bombero human niulbo ang sunog sa may M. Velez Street, Barangay Capitol Site, Dakbayan sa Sugbo pasado alas 8 kagahapon sa buntag.

Ang naangol mao si Eddie Palmes kinsa nakaangkon og samad sa abaga human kini natagakan og gahi nga butang diha’ng iya’ng gigiyahan ang mga bombero sa pagsulod sa apartment samtang atol sa hitabo duha ka Pekinese nga iro ang naluwas.

Sumala pa ni Senior Fire Officer 2 Emiliano Daño nga ila’ng nadawat ang alarma sa sunog alas 8:33 sa buntag human nanawag og tabang sa kabomberuhan si Vickey Amadora, manager sa Amadora apartment.

Matud ni Daño nga nagsugod ang sunog sa Door 1 sa 12-door apartment nga giabangan ni Romy Ray Soriano kinsa wala atol sa hitabo ug iya’ng duha ka katabang ug anak ang didto sa ground floor.

Ang mga silingan na ni Soriano ang nialarma sa sunog.

Sulod sa 17 minutos nakontrolar ang sunog ug alas 12:39 sa udto hingpit nga napawong ang kayo nga niugdaw sa tulo ka lawak ug nakan-an usab ang ubang lawak.

Problema sa linya sa kuryente ang gidudahang hinungdan sa sunog nga nagbilin og tunga sa milyon ka pesos nga danyos.

Matud ni Fire Marshall Chief Inspector Rogelio Bongabong nga wala’y partition wall ang apartment hinungdan sa dali nga pagkaylap sa kayo ilabi na nga ang ibabaw nga bahin ginama sa kahoy.

Si Capitol Site Barangay Kapitan Manuel Guanzon nibutyag nga tukion nila sa konseho kung unsa nga hinabang ang ila’ng ihatag ngadto sa mga nasunugan.

Samtang ang ikaduha’ng sunog nga diriyot moulbo sa bag-o pa lang nga Gaisano Capital South sa may second floor duol sa dock sa may exhaust fan.

Matud ni Senior Fire Officer 1 Ariel Balajadia nga nadawat ang alarma alas 10:25 sa sa buntag.

Wala na kapasirit ang mga firetrucks tungod kay dali ra man natabang sa fire brigade sa mall. (BANAT NEWS)