Pag-apply sa local absentee voting kutob Marso 7
CEBU, Philippines – Hangtud sa Marso 7 lang ang pagduso sa application sa local absentee voting sa mga sakop sa media ug mga opisyal sa gobiyerno nga mo-duty sa Mayo 9, 2016 nga eleksiyon.
Kini base sa gipakanaug nga Resolution No. 9981 sa Commission on Elections nga nagmando sa local absentee voters sa pagbotar og una unya sa Abril 27 hangtud 29, 2016.
Apil sa mao’ng pribilihiyo ang mga sakop sa Philippine National Police ug Armed Forces of the Philippines nga idestino sa laing lugar.
Hinuon ang mahimo’ng botaran mao lang ang nasudnong posisyon ug mga party-list. Sa taho sa STAR, ang tigpamaba sa Comelec, James Jimenez, nitataw nga kadto lang rehistrado nga botante ang eligible sa absentee voting.
Sa mga sakop sa media, ang application forms kuyog sa certification sa kompaniya ang iduso sa buhatan sa election officer sa highly urbanized cities ug sa provincial election supervisor.
Ang Republic Act 10380 kon ang Act Providing for Local Absentee Voting for Media, Media Practitioners and support staff naghatag og kahigayunan sa pagbotar sa dili pa ang adlaw sa eleksiyon.
Ang Comelec nitakda usab sa Abril 15 nga katapusang adlaw sa pag-verify sa eligibility sa aplikante alang sa local absentee voting. – /GMR) (BANAT NEWS)
- Latest
