Simbahan motabang sa nasunogan

CEBU, Philippines – Mohatag og mga hinabang ang Archdiocese of Cebu ngadto sa mga nabiktima sa sunog sa Sitio Avocado, Brgy. Lahug ning Dakbayan sa Sugbo niadtong Sabado.

Si Cebu Archbishop Jose Palma mibutyag nga ilaha nang gipalihok ang Carritas Center aron motabang sa 187 ka pamilya nga nagpuyo sa 81 ka mga balay nga naugdaw sa maong insidente.

Matud ni Palma, gawas sa pag-mobilize sa Carritas, giawhag usab niya ang kaparian nga magtampo-tampo og hinabang alang sa mga nasunogan.

Ang maong barangay gipaubos na sa state of calamity aron magamit nila ang  pundo pagpalit sa mga kinahanglanong gamit sa mga biktima.

Samtang gi-imbestigar usab sa Cebu City Fire Department ang Lahug Fire Sub-Station, human sa reklamo nga wala gilayon sila makaresponde sa sunog nga atbang ra man unta ang ilang buhatan sa dapit nga nasunugan.

Sayo niini, si SFO1 Custodia sa Lahug Fire Sub-Station, mipasabot nga wa dayo’y naka-report ngadto sa ilang buhatan nga dunay nahitabong sunog, usa nila ka kauban maoy nakabantay gikan sa ilang bintana maong naalarma sila.

Apan ang ilang fire truck kinahanglan pang painiton ang makina aron moandar kay karaan na kaayo.

Si Fire Marshal Rogelio Bongabong, nagkanayon nga mopatawag siya og tigom  sa tanang sub-station fire marshals aron sa paghisgot kalabot niini.

Matud niya nga sa higayon nga dili siya matagbaw sa pagpasabot sa Lahug Fire Sub-Station, hayan mag-atubang og silot ang mga sakop niini. Samtang adunay tinubagay nga nahitabo  sa clearing operation sa dapit tali ni Konsehal Mary Ann Delos Santos ug clearing team

Matud pa ni Rey Daniel Relampagos, usa sa mga nasunogan, gusto ni Delos Santos nga sabuton una ang taga University of the Philippines nga maoy gipiyalan sa Kapitolyo sa maong luna sa kondisyon nga tukoran kini og mga dugang edipisyo.

Si Atty. Collin Russel, ang pangulo sa Division for the Welfare of the Urban Poor nibutyag nga nisugot na ang mga residente sa reblocking tungod gikinahanglan kini.

Giawhag ni Russel ang tanan mga opisyal nga mas maayong  mosugyot sila para sa kaayohan sa kadaghanan sa mga apektado ug di maglalisay. – /EIM) (BANAT NEWS)