Dalaga nga polis gikawatan

CEBU, Philippines – Gikawatan ang usa ka polis samtang sila namahuway daplin sa dagat sa Barangay Pooc, Dakbayan sa Talisay kagahapon sa kadlawon.

Ang polis mao si Mary Joylyn Mahilum, 38-anyos, dalaga nga taga sitio Paglaum, Bulacao, Cebu City, kinsa sakop sa Regional Intelligence Branch (RID) sa Police Regional Office-7.

Hinuon iya’ng nadakpan ang kawatan nga si Marvin Lastimado, 20-anyos, ulitawo nga taga Barangay Pooc, Talisay City.

Sumala pa sa imbestigasyon nga nag-overnight swimming ang pamilya ni Mahilum sa Pooc.

Tungod kay sila gipangkapoy, namahuway sila sa tent.

Apan ang suspek ang hinay-hinay sab og ukoy sa cellphone sa biktima nga kantidad og P10,000.

Apan wala’y swerte ang suspek tungod kay nakabantay ang biktima diha’ng gikuha ang cellphone.

Nasikop ang suspek ug narekober ang cellphone ug nakuhaan og kutsilyo ug drug paraphernalia.

Gidala ang suspek sa Talisay City Police Station diin siya gitanggong ug pasakaan og kaso. – /GMR) (BANAT NEWS)