Maestro nga nag-party nalumos

CEBU, Philippines – Nalumos sa swimming pool ang usa ka magtutudlo nga kuyog sa iyang mga kaubang magtutudlo nga nagsaulog og Christmas Party sa Aroma Mountain Resort nga nahimutang sa Barangay Macaas, Lungsod sa Catmon ala 1 pasado ang takna sa hapon niadtong Biyernes.

Si Police Officer 1 Tirso Coming sa Catmon Police Station miila sa namatay nga mao si Rolando Almacera Gulane, 51, nagpuyo sa Barangay Poblacion, Lungsod sa Medellin ug magtutudlo sa Almacin Torevillas National High School sa Lungsod sa San Remegio.

Matud pa ni Coming nga nakig-inom pa ang biktima sa mga kaubang magtutudlo human sa ilang paniudto ug nananghid nga moadto sa swimming pool aron maligo.

Sa paglabay sa pipila ka mga gutlo  nasigpatan na kini sa pool  maintenance nga si Paul Carlo  Pusa Monersa  nga naglutaw na sa tubig ug dali unta kining gisalbar  ug gidala sa iyang mga kauban ngadto sa Don Juan Dosado Memorial Hospital sa Lungsod sa Sogod apan gideklarar kini sa mga doktor sa maong tambalanan nga dead on arrival.

Giawhag sa kapolisan ang mga kabanay sa namatay nga ipaubos sa autopsy ang iyang lawas aron pagsuta sa hinungdan sa kamatayon niini.  (BANAT NEWS)