“Gun for hire” nakigpinusilay naangol
CEBU, Philippines - Gidudahang gun for hire nalandig sa tambalanan human nakigpinusilay sa kapulisan diha sa Isla Verde, Barangay San Isidro, dakbayan sa Talisay niadtong Martes sa hapon.
Ang suspek mao si Jonas Largo, nagpuyo sa nahisgutang lugar kinsa nakuhaan og kalibre 45 pistola ug nakaangkon og samad pinusilan sa tuo nga dughan.
Matud pa ni Senior Police Officer 1 Mikie Espina sa Talisay City Police gireklamo ang suspek sa usa ka Eduardo Bascon, 53, kay gihulga siya niini nga patyon ug giatangan siya niini diha sa ilang balay nga nagdala og armas.
Tungod sa maong tawag, miresponde sila si Espina uban sa iyang mga kaubanan ug ilang nakita si Largo nga nagbarog sa gawas sa panimay ni Bascon ug nagbitbit og armas.
Matud pa nga gisangpit nila si Largo ug nagpaila sila nga mga pulis ug nimando nga ibutang ang iyang armas apan imbes mopatuo gipabuthan sila niini sa makadaghang higayon hinungdan sa ilang pagbawos ug naigo kini sa dughan. Daling gidala sa Talisay City District Hospital ug gibalhin sa Don Vicente Sotto Memorial Medical Center si Largo.
Nakuha gikan kaniya ang .45 nga armas lakip ang holster ug tulo ka mga bala samtang upat ka empty shell sa .45 nga bala diha sa crime scene.
Si Bascon nga nahinabi sa Banat News niingon nga naglibog siya kun nganong gusto siyang patyon sa suspek nga wala man unta silay away.
Apan si Espina nipasabot nga si Bascon minyo apan nakigbuwag sa paryente ni Largo. (BANAT NEWS)
- Latest
