Kanhi drug addicts magtigom
CEBU, Philippines – Gatosan ka mga kaniadto nagumon sa ilegal nga drugas nga gipaubos sa rehabilitasyon sa nagkadaiyang rehab centers ug sa We Care Program sa Cebu City Office on Substance Abuse Prevention (COSAP) mopahigayon og convention karong adlawa.
Ang maong kalihokan himuon alas-6 sa gabii diha sa Fort San Pedro sa Plaza Independencia ning Dakbayan sa Sugbo.
Matud pa sa pangulo sa COSAP, Dr. Alice Utlang, ikaduha na kini karon ka tuig ang maong kalihokan sa mga “recovering addicts.”
Sila magpaambitay sa ilang mga sekreto sa wala na sila nagumon paggamit sa ginadiling drugas ug sa ilang mga kasinatian giunsa nila pagtalikod ang maong bisyo.
Sumala pa ni Utlang, dunay daghan mga recovering addicts ang wala na nigamit og drugas sulod sa 20 ngadto sa 30 ka tuig.
Usa sila sa mga mopaambit ngadto sa bag-o pa nga nitalikod niini aron magiyahan ug di na mobalik pa sa maong dautang bisyo. – /EIM) (BANAT NEWS)
- Latest
