Director sa CHED ikiha gyud sa mga tinun-an

CEBU, Philippines - Mopasaka gyud og kaso ang grupo sa mga tinun-an sa Southwestern University (SWU) College of Medicine batok ni Commission on Higher Education (CHED)-7 regional director Freddie Bernal.

Kini may labot sa giingong pagbaliwala ni Dr. Bernal sa mando sa Malacañang nga naglibkas sa Cease and Desist Order batok sa tunghaan.

Kahinumduman nga nag-rally ang gatusan ka medical students sa buhatan sa CHED niadtong Martes diin usa niini si John Ivan Vicera mibahad nga mopasaka gyud sila og kaso batok kang Bernal.

Wala pa hinuon sila'y petsa kun kanus-a nila ipasaka ang kaso kay gitigom pa nila ang gikinahanglang ebidensya.

Si Dr. Bernal sa iyang bahin mihangop sa plano sa mga tinun-an nga pasakaan siya’g kaso apan gihagit niini ang kadagkoan sa SWU nga klarohon ang kahimtang sa ilang mga tinun-an.

Matud pa nga si Dr. Bernal nakig-atubang sa mga tinun-an atol sa rally diha nga nakabiya na ang mga tigbalita.

Gihulagway sa mga tinun-an nga dili sinsero si Dr. Bernal sa iyang mga pamahayag.

Ang mga isyu nga gustong ipaklaro sa mga tinun-an mao nga mahatagan sila og special order number alang sa graduation, unya mo-isyu kini og letter alang sa renewal sa student's visa sa mga langyaw nga mga tinun-an ug mosuwat kini SA FAIMER aron ma-recognize kini isip usa ka medical school sa tibuok kalibutan.

Si Jonathan Casio, usa sa mga tinun-an, miawhag ni Bernal nga respetohan ang Stay order nga giisyu sa Office of the President.  (BANAT NEWS)