Gisud sa balay gipatay

CEBU, Philippines - Natusak-tusak sa bala ang lawas sa usa ka 51 anyos nga lalaki human kini gipusil sa usa ka lalaking nag helmet samtang kini nagdula og baraha kauban ang iyang mga higala diha sa Bayani Apartment, Barangay Quiot ning dakbayan sa Sugbo.

Ang gipatay mao si Alfonso Bayani III, nagpuyo sa maong dapit. Matud pa ni Senior Police Officer 2 Rommel Bancog sa Homicide Section sa Cebu City Police Office nga nahinabi sa Banat News personal nga motibo ang ilang gisubay sa maong krimen.

Samtang nagbaraha ang biktima kauban ang iyang mga barkada kalit lang naabot ang usa ka lalaki ug nangutana “Kinsa si Jun ninyo?”

Human mitubag ang biktima nga “ako” kalit mibunot og armas ang gunman ug dayong pusil sa biktima hinungdan naglumbaanay og panagan ang iyang mga kaduwa.

Dali usab nga misibat ang gunman sakay sa usa ka motorsiklo nga gibilin unahan sa nahitaboan, gituohan kining gun for hire. Samtang gitino pa kun kinsa ang mga nakaaway sa biktima.

Si Bancog midugang gikatahong adunay tawong nagsige og pangutana kung naa ba ang biktima sa iyang balay. (BANAT NEWS)