Sakop ni Daan sikop sa pagpanungggab

CEBU, Philippines – Nasikop sa kapolisan sa Siyudad sa Talisay ang notado’ng tulisan nga nakadunggab sa iya’ng silingan sa Sambagan, Barangay Tanke niadtong Lunes sa hapon.

Ang biktima nailhan nga si Jonard Oca, 32-anyos, ulitawo nga nagpuyo sa nahisgutang lugar samtang ang suspek mao si Lendy Maglinte, 23-anyos.

Sa imbestigasyon nasuta nga nagbarug sa basketbolan ang biktima diha’ng kalit nibutho ang suspek nga armado og hait nga hinagiban.

Wala’y daghang estorya, gihansak sa suspek ang kutsilyo sa kalawasan sa biktima dayun sibat. Gidala sa tambalanan ang biktima.

Sa hot pursuit operation sa kapolisan nasikop si Maglinte ug nakuhaan sa walo ka pulgada’ng kutsilyo nga gigamit sa pagdunggab.

Sa pagsusi sa kapolisan, si Maglinte sakop sa napatay nga si Ritchie Daan kinsa nailhan nga notado’ng kriminal sa Talisay ug gani nalakip kini sa top 10 most wanted sa siyudad.

Ang grupo ni Daan giingong nihinay tungod sa kamatayon sa ila’ng lider niadto’ng nilabay nga buwan.

Nasuta sab sa mga awtoridad nga adunay pending nga kaso’ng robbery, frustrated murder, theft ug illegal possession of firearms and ammunition si Maglinte sa nagkalainlaing korte.

Si Supt. Germano Mallari, hepe sa kapolisan sa Siyudad sa Talisay, niingon nga notado na si Maglinte sa iya’ng pangedaron tungod kay sayo kini’ng na-expose sa mga tawo’ng notado sa krimen.

Asoy pa niya nga laing kaso na sab ang ila’ng ipasaka sa dinakpan may kalambigitan sa pagdunggab sa silingan. – /GMR) (BANAT NEWS)