Tulo sikop sa buy-bust
CEBU, Philippines - Gipasakaan na og kaso ang tulo ka pushers kinsa nasikop ug nasakmitan og mokabat sa P259,600 nga kantidad nga shabu sa buy-bust operation sa kapolisan sa Cogon, Poblacion, Lungsod sa Liloan alas 6 pasado sa niagi’ng gabii.
Si Senior Inspector Ramil Morpos, hepe sa Liloan Police Station, niila sa mga akusado nga sila si Miguelito Paran Laag, 36; Kenneth Tamula Bughao, 34 ug Paulo Paran Laag Jr., 42, pulos nagpuyo sa mao’ng dapit.
Matud ni Morpos nga usa sa iya’ng mga sakop ang nagsilbi’ng poseur buyer ang nagpalit og shabu kang Miguelito ug sa pagtunol sa usa ka pakete dali kini’ng gidakop.
Ang laing duha ka kauban nga nasakmitan usab og shabu ang lakip sa gisikop ug gibalhug na sa detention cell.
Nasakmit usab ang salapi nga nagkantidad og P6,370 nga gituohang halin sa ilegal nga pagpamaligya og shabu sa mga dinakpan. (Romeo T. Limpangog/GMR)(BANAT NEWS)
- Latest
