Anak ni JVR gikiha ni Gullas

CEBU, Philippines - Gikiha ni kanhi kongresista Eduardo Gullas ang anak ni Mayor Johnny de los Reyes nga si Clifford sa buhatan sa Talisay City Prosecutor kagahapon sa hapon.

Si Gullas ang niduso og unom ka pahina sa kaso’ng libel in relation to cybercrime law gumikan sa panamastamas ni Clifford batok kaniya sa Facebook.

Matud ni Gullas nga siya ang gipasanginlan sa anak sa mayor nga nakadawat og inisyal nga P30 milyones sa pagbaligya sa Tabunok Public Market.

"Bisag ikaw naman tingali nga butang-butangan ka nga nakadawat kag P30 milyones unya dili tinuod dili kaha ka mo-file og libel?" matud ni Gullas.

Sigun pa niya nga daghan sa iya’ng mga amigo ang nakakita sa post ni Clifford ug iya kini’ng gi-screenshot ug giuban sa affidavit.

Matud pa sa post niadto’ng Septiyembre nga gibabagan sa konseho ang bag-ong merkado tungod kay gibaligya na kini sa tiguwang ug gani nakadawat na og inisyal nga P30 milyones gikan sa daku’ng negosyante.

Si Gullas nagkanayon nga wala tuod gibutang ang iya’ng pangan apan klaro ug tataw kaayo nga siya ang gipasabot niini kay tulo sila ang nidagan sa pagka-mayor sa Talisay.

"Ang nakaparat kay tiguwang ang iya’ng gi-mention wa hinuon gihisgutan ako’ng pangan pero tulo ra man mi nidagan, duha ang tiguwang ako ug ang iya’ng amahan kay ang usa batan-on man si Romy. Pero dili mahitabo nga iya’ng amahan ang iya’ng gipasabot, so ako ra gyud. Dili na tinuod binuang na," asoy ni Gullas.

Si Atty. Oscar Capacio, kanhi prosecutor sa siyudad, nibutyag nga daghan pa unya sila’ng kaso nga ipasaka batok sa kampo ni de los Reyes. (Gabriel C. Bonjoc/GMR)(BANAT NEWS)