Outpost ibutang sa SRP-Talisay

CEBU, Philippines – Gitug-an sa hepe sa kapolisan sa siyudad sa Talisay nga aduna na sila’y gisundan nga mga responsable sa pagpanglabni nga niresulta sa kamatayon sa usa ka lalaki ug pagkaangol sa duha ka babaye sa South Road Properties (SRP) sa barangay San Roque sa niagi’ng semana.

Si Supt. Germano Mallari nagdumili pa lang pagbutyag sa mga pangan apan iya’ng giklaro nga naa ra sa Talisay ug sa siyudad sa Sugbo nagsaoy-saoy ang mga kriminal.

Sa nasayran, si Roel Cabusas, 34, sales supervisor sa usa ka ice cream company, ang nag-motor paingon sa siyudad sakay ang iya’ng hinigugma nga si Lea Jane Desamparado ug igsuon niini nga si Elvie.

Apan pag-abot sa nahisgutang lugar gilabni sa suspek ang bag sa mga biktima dayun sikad sa motor nga ila’ng gisakyan hinungdan sa ila’ng pagkatumba.

Nagrabehan sa hitabo si Cabusas ug kini namatay pipila ka oras ang nakalabay.

Tungod sa hitabo nirekomendar si Mallari nga mobutang og outpost sa mga chokepoint areas aron dali masikop ang mga kriminal.

Gawas sa outpost nagkinahanglan usab sila sa tabang sa mga tanod sa barangay tungod sa kakuwang sa kapolisan.

Samtang si Konsehal Edward Alesna, tsirman sa komitiba sa kahapsay ug kalinaw, nibutyag nga ang plano ni Mallari ila’ng suportahan.

Asoy pa niya nga kun kinahanglan ang budget andam sila nga motagana tungod kay naa na man sila sa paghan-ay sa budget karong panahona. – /GMR) (BANAT NEWS)