Dalagita, lalaki nabanggaan patay
CEBU, Philippines – Patay ang duha ka tawo lakip sa usa ka dalagita nga gisugo og palit og shampoo human sila nabangaan sa managlahi’ng lugar sa lalawigan sa Sugbo niadto’ng Sabado.
Napunggit sa mini-dump truck ang dalagita nga naglakaw daplin sa dalan pasado alas 8 sa buntag sa barangay Daan Lungsod, Alcoy.
Ang bata nga si Artnielyn Mae Mosqueda, 12, gidala pa unta sa tambalanan apan gideklarar nga dead on arrival.
Ang nakabangga niya nga si Agapito Altamera, 27, taga El Pardo, Boljoon, nabuhian ra sa mga polis human nagkasinabot ra ug sa pamilya sa bata.
Si PO3 Rosendo Binondo, desk officer sa Alcoy Police Station, niingon nga ang bata padulong na unta mouli sa ila gikan nagpalit og shampoo kay gisugo sa iya’ng igsuon.
Diha’ng naglakaw kalit lang naigo sa ligid ug kilid sa mini-dump truck ug nalabay tungod sa impact.
Wala nakabantay ang drayber tungod kay apiki ug dulhugon ang dalan sumala pa ni Binondo.
Diha’ng nabantayan niya nga nalagpot ang bata, iya’ng gitabang ug sa mga residente sa lugar ug gidala sa Julio Cardinal Rosales Memorial Hospital sa Dalaguete.
Ang drayber nipasalig nga abagahon ang galastohan sa paglubong sa bata hinungdan nga gibuhian kini sa kapolisan.
Samtang patay ang usa ka lalaki human nabanggan sa motor samtang nilabang sa dalan pasado alas 4 sa hapon sa barangay Bateria, Daanbantayan.
Hemorrhage sa ulo ang gitumbok nga hinungdan sa kamatayon ni Tedilo Maluya, 58, molupyo sa mao’ng dapit samtang ang nakabangga mao si Christian Edem, 28, taga Malbago, Daanbantayan. – /GMR) (BANAT NEWS)
- Latest
