Probinsiya sa Mactan gitinguha

CEBU, Philippines - Nagtinguha si kanhi Cordova mayor Celedonio Sitoy nga mahimong buwag nga probinsiya ang isla sa Mactan.

Kini ang usa sa tumong ni Sitoy sa iya’ng pagpili sa pagka-kongresista sa dakbayan sa Lapu-Lapu ubos sa Partido Demokratiko Pilipino-Lakas ng Bayan (PDP-Laban).

Unahon ni Sitoy ang paghimo’ng lungsod sa isla sa Olango aron kuyog sa dakbayan sa Lapu-Lapu ug lungsod sa Cordova nga molangkub sa probinsiya sa Mactan.

Kauban ni Sitoy nga nisang-at sa ila’ng certificate of candidacy kagahapon si Rolando Patalinjug sa pagka-mayor sa Partido Kusgano- Movement for Better Lapu-Lapu nga ubos sa PDP-Laban.

Pares ni Patalinjug mao si Rufo “Popo” Amores III sa pagka-bise mayor ug ila’ng mga konsehal sila si Ferdinand Dungog, Celestino Aying, Jesus Vicente dela Cerna, Rufo Bering, Francisco Gilig Jr., Maria Fe Imbong, Alex Dave Godornes, Cesario Silawan, Ernesto Tumulak ug Carlito “Tantan” Sabalones.

Matud ni Sitoy ug Patalinjug nga pareho ang problema sa tibuok isla nga ila’ng atimanon sa ila unya nga pamunoan.

Si Patalinjug niluwat sa daku niya’ng posisyon sa Mactan Export Processing Zone Authority aron lang moalagad sa taga dakbayan.

Tumong ni Rordiguez nga tagaan og pagtagad ang panginahanglan sa urban poor samtang tutukan usab niya ang infrastructure.

Si Sitoy usab kinsa igsuon ni Cordova Mayor Adelino Sitoy ang niluwat isip kapitan sa Gabi ug presidente sa Association of Barangay Councils sa Cordova aron magpapili isip kongresista.  (BANAT NEWS)