Abtik nga pusher, laing duha nasikop

CEBU, Philippines - Nasikop sa kapolisan ang giingong abtik nga pusher sa lungsod sa Sogod samtang laing duha ang nasikop sa buy-bust operation sa lungsod sa Liloan kinsa nakuhaan og mokabat sa P100,000 nga kantidad sa shabu.

Si Police Officer 1 Ronald Rondina sa Sogod Police Station niila sa nadakpan nga si Joey Branzuela Hembra, 29, nagpuyo sa sitio Patag, Damulog.

Matud ni Rondina nga ang dinakpan makadaghan na gihimoan og operasyon apan kanunay kini’ng makaipsot ug dili masikop.

Nasakmit gikan sa suspek ang duha ka gagmay nga pakete sa shabu ug P700 nga gituohang halin sa pagpamaligya niini.

Samtang si Senior Police Officer 4 Octavio dela Paz sa Liloan Police Station niila usab sa ila’ng nadakpan nga managpuyo nga sila si Manuel Mendoza Bughao, 34, taga Purok Tugas, Poblacion ug April Rose Monterola, 19, taga Pili, dakbayan sa Danao.

Matud ni dela Paz nga ang ila’ng hepe sa lungsod nga si Senior Inspector Ramil Morpos ang nagpasiugda sa buy-bust operation alas 2 pasado sa hapon sa niagi’ng adlaw.

Diha’ng girekisa ang kalawasan sa dinakpan, nakuha ang usa ka daku’ng pakete sa shabu ug napulo ka gagmay nga pakete.

Si Monterola nasakmitan usab og upat ka gagmay nga pakete sa gidudahang shabu.

Dugang nasakmit gikan sa mga dinakpan ang lima ka hand rolled tin foil ug ubang drug paraphernalia. (BANAT NEWS)