Amerkano nag-solicit gamit si Magpale

CEBU, Philippines - Usa ang patay samtang duha ang nasikop sa buy-bust operation nga nisangpot sa shootout tali sa kapulisan sa Pusok Police Station ug gidudahang drug suspects sa Sitio Mahayahay, barangay Bangkal dakbayan sa Lapu-Lapu kagahapon sa buntag.

Girumbo sa kapulisan ang usa ka gituohang drug den sa lugar apan usa ka Jolan Dela Cruz, 28, ang gikatahong nisuway pagpusil sa mga polis maong kini napusilan.

Nadakpan usab ang duha niya ka kauban nga magsuong sila si Julius ug Joselito Malingin, ang tulo pulos residente sa sitio Soong, barangay Mactan sa maong siyudad.

Matud ni Inspector Alden Zambrano, Chief of Police sa Pusok Police Station nakadawat sila og tawag gikan sa usa ka concerned citizen bahin sa mga namaligya og drugas sa maong dapit.

Human nila makompirmar ang report, nakig-alayon dayon sila sa Philippine Drug Enforcement Agency (PDEA)-7 alang sa pagpahigayon og operasyon sa usa ka balay nga gihimong drug den.

Apan matud pa dihang nanulod na ang mga polis sa lugar, kalit nga mibutho si dela Cruz gikan sa pikas nga balay ug nisuway og pusil kang PO1 Benjo Amores apan swerteng wala nibuto ang armas.

Ang  kauban ni Amores nga si PO1 Vhenje Pantuan pagkakita sa hitabo daling  nipusil kang Dela Cruz apan nakadagan kini ngadto sa suok nga bahin ug wa na nila makit-i. Duna na lay mipahibalo kanila nga adunay patay’ng lawas sa tawo diha sa sudlonong bahin sa lugar ug nasuta nga si Dela Cruz diay kini.

Samtang ang magsuong Malingin kusganong mihimakak nga namaligya sila og ilegal nga drugas , matud nila wala sila makaila ni Dela Cruz apan tiggamitan sila og ginadiling drugas.

Nakuha sa kapolisan diha sa lugar ang 12 ka gagmay’ng paketeng gituohang  shabu, drug paraphernalia, ug kalibre .38 nga revolver. (Decemay P. Padilla/EIM)(BANAT NEWS)