‘Gisugo’ og pagpalit og drugas gipatay
CEBU, Philippines - Tulo ka bala sa ulo ang mitapos sa kinabuhi sa 44 anyos nga lalaki human kini gipusil sa wala mailhing tawo samtang nagtambay kilid sa usa ka internetan sa sudlonon nga bahin sa sitio Sampaguita, Villagonzalo II, barangay Tejero ning dakbayan sa Sugbo kagahapon sa kaadlawon.
Giila ang biktima nga si Dante Echavez, minyo ug nagpuyo sa maong dapit.
Matud pa ni Senior Police Officer 2 Wetzil Berry, imbestigador sa Homicide Section sa Cebu City Police Office posibleng may kalambigitan sa ilegal nga drugas ang motibo sa hitabo.
Si Berry miingon nga sa nakuha nila nga impormasyon tiggamitan og ilegal nga drugas ang biktima ug mao usab kini ang suguon sa iyang mga higala kung magpapalit og drugas. Nagduda ang kapolisan nga malagmit gisugo ang biktima unya wala na nibalik hinungdan nga kini gibirahan.
Matud pa kalit lang mibutho sa likod sa biktima ang mamumuno ug diretsong gipusil ang likod sa ulo sa biktima makatulo ka higayon.
Sumala pa ni Berry nga sa gidaghanon sa samad pinusilan sa ulo sa biktima tataw kaayong dako kaayo ang kalagot sa naghimo sa krimen.
Narekober sa crime scene ang tulo ka basiyo sa .45 caliber pistol ug usa ka deformed slug. (BANAT NEWS)
- Latest
