Gipatay atubangan sa nalisang kaayo nga kapuyo

CEBU, Philippines – Lalaki nga nagpatubil ra og gasolina sa usa ka gasoline station didto sa Barangay Libo, Sibonga kaniadtong Domingo sa udto gipusil patay sa duha ka wala hiilhi nga mga tawo atubangan sa iyang kapuyo. Ang gipatay mao si Renato Redoblado, 41, molupyo sa Barangay Libo.

Pagkanaog g’yud sa kapuyo ni Redoblado gikan sa motor, kalit lang miabot ang duha ka lalaki nga nagsakay og motor ug nagtaptap sa ilang panagway.

Si Redoblado ug ang iyang kapuyo nga si Maria Fe Sagayno nakuratan diha nga ang angkas sa nagmotor nanaog ug mibunot og pusil dayong tira sa biktima. Human makaangkon og pinusilan sa ulo si Redoblado ang nagpusil abtik kaayo nga midagan paingon sa iyang kauban nga nagpaabot ug nagsakay lang gihapon sa motor.

Si Redoblado dali nga gidala sa Cebu Provincial Hospital sa Carcar City apan gideklarar na kini nga patay na. Ang mga polis nakakaplag og unom ka kabhang ug upat ka slug sa kalibre .45 nga pistola.

Wala pa g’yud masuta sa kapolisan ngano nga gipatay man ang biktima. – /RUB) (BANAT NEWS)