‘Laglag barya gang’ manguot na sa colon

CEBU, Philippines - Subli na sab nga nakabiktima ang grupo sa “laglag barya gang” nga una’ng nakabiktima sa asawa sa kanhi konsehal sa dakbayan sa Sugbo.

Apan niining higayuna, dili na laglag barya ang ila’ng tirada kun dili mao na sab ang pagpanguot.

Kini ang gitug-an sa hepe sa Theft and Robbery Section (TRS) sa Cebu City Police Office, Chief Insp. David Señor, nga nahinabi sa mga tigbalita.

Matud ni Señor nga usa sa siyam ka suspek nga babaye mao’y giila sa mga biktima ug may kauban nga mahuyang.

Nagtuo si Señor nga human nadakpan sa kapolisan ang grupo didto sa Consolacion sa nakalabay nga buwan, lagmit kini nakapiyansa ug nibalik na sab sa ila’ng trabaho.

Nagkadaiya’ng dapit sa dalan Colon gikataho’ng nakaigo na sab ang grupo sa pipila ka tawo.

Duda sab si Señor nga posible’ng may bag-ong kauban ang grupo nga nag-operate sa Sugbo.

Usa sa gipanid-an karon sa mga sakop sa TRS kung asa nagtago ang grupo aron ila na sab kini masikop.

Samtang ang hepe sa City Intelligence Branch, Supt. Romeo Santander, niangkon nga ang Colon area mao ang gitawag sa kapolisan nga “hot seat” kay halos permanente nga may mabiktima sa mga badlungon.

Si Santander nipasabot nga dunay himuong kausaban sa pagpatuman sa seguridad sa mao’ng mga lugar.

Wala na hinuon gibutyag ni Santander kung unsa nga kausaban apan kini niingon nga ang taga CIB ang mangunay o mangulo sa pagsusi kung kini ipatuman ba sa naasoy nga buhatan sa kapolisan.

Makig-alayon usab sila sa Mandaue City Police Office may labot na sa profile sa mga suspek ug sa ila’ng grupo.  (BANAT NEWS)