Misibat sa checkpoint napasok sa multicab
CEBU, Philippines - Patay ang usa ka drayber sa motorsiklo human kini misibat sa checkpoint apan nakabangga hinuon og usa ka barangay tanod hangtod nga napasok siya sa usa ka multicab diha sa Brgy. Abucayan sa lungsod sa Balamban pasado alas 2 sa nakalabay nga hapon.
Ang drayber sa motorsiklo giila nga si Alvin Tiro, nagpuyo sa maong barangay.
Samtang ang barangay tanod nga naangol mao si Jaime Calvo, nagpuyo sa maong dapit.
Matud pa ni Police Officer Roy Olasiman sa Balamban Police nga nahinabi sa Banat News milikay sa checkpoint sa kapolisan ug mga sakop sa Special Force sa Philippine Army si Tiro nga luwan og motorsiklo.
Apan pag-abot sa taytayan nabanggaan ni Tiro ang barangay tanod nga si Calvo nga nagmandar sa dagan sa trapiko kay giayo ang pikas nga linya sa tulay.
Gumikan sa kakusog sa bangga nilupad sa motorsiklo si Tiro ug didto mipasok sa naghunong nga multicab nga gimaneho ni Calvin Cristoria, 26.
Grabeng bun-og sa lawas ug ulo ang naangkon ni Tiro ug gidala pa unta sa Balamban District Hospital apan nakabsan gayod sa kinabuhi.
Ang barangay tanod ang gidali sab og balhin sa Vicente Sotto Memorial Medical Center (VSMMC) gumikan sa grabeng bun-og nga naangkon.
Nagduda si Olasiman nga walay lisensya o rehistro sa motor si Tiro hinungdan nga misibat kini sa checkpoint.(BANAT NEWS)
- Latest