Mary Ann nanaog pagka-minority leader

CEBU, Philippines – Konsehal Mary Ann Delos Santos nikanaog sa pwesto isip minority floor leader sa konseho sa dakbayan sa Sugbo.

Sa privilege speech ni Delos Santos diha sa konseho atol sa session kagahapon dala ang pagpadayag sa iyang kahiubos tungod sa mga nanggawas nga mga estorya batok kaniya, ilabi na ang pasangil nga nitapon na siya sa pikas nga partido.

Dugang pa ni Delos Santos nga wala na’y hinungdan pa ang paglingkod niya isip minority floor leader sa konseho kay gusto siyang magpabilin nga indepedente.

“Basically there’s no point for me to stay there, I cannot maintain my independence if I will be in the position. I will be hypocrite if I will be staying in my position,” matud pa sa konsehal.

Apan abli gihapon ang pultahan ni Delos Santos para sa partido nga buot mosalo kaniya.

Nagkanayon si Konsehal Wenceslao nga nakita nila nga wala na mabarugi ni De Los Santos ang iyang posisyon isip minority floor leader nga mao ang pagdepensa sa minoriya.

Apan ila kining nabantayan sa pipila ka nilabay nga session apil na niini ang pagbabag sa pagbaligya sa SRP nga nidapig si De Los Santos sa mayoriya sa konseho.

Ang minoriya gilangkoban sa mga sakop sa partido Team Rama ug ang mayoriya gikan sa Bando Osmeña Pundok Kauswagan.

Si De Los Santos gikatahong giimbitar na sa BOPK ug gihaylo og pwesto sa lineup sa umaabot nga piniliay.

Apan gipahibalo nang daan ni Mayor Michael Rama nga apil gihapon sa lineup sa amihanan si De Los Santos.

Gipasabot usab ni Rama nga magpabilin ang konsehal sa ilang partido ug respetohon usab ni Rama ang desisyon niini.

Wala pa hinuoy gibuhiang pamahayag si De Los Santos kun magpabilin siya sa Team Rama o mobalhin sa BOPK. Si delos Santos gikatakdang mopatawag og press conference karong umaabot nga Biyernes. – /EIM) (BANAT NEWS)