Na-rescue sa NBI tabangan
CEBU, Philippines - Gitanyag sa kagamhanan sa dakbayan sa Lapu-Lapu ang ila’ng Home Care Center nga kabutangan sa mga menor de edad nga na-rescue atol sa cyber-pornography raid sa National Bureau of Investigation-7 sa barangay Mactan ug Babag 1 niadto’ng Huwebes.
Kapin sa 10 ka menor de edad ang na-rescue human gidakop ang mga suspek sa pag-operate og cybersex dens nga sila si Jeramie Paquibot, 25, ug Editha Aying, 49,taga sitio Soong 1, Mactan ug Grace Ybañez, 31, taga sitio Timpolok, Babag 1.
Matud ni Mayor Paz Radaza nga angay sila’ng tabangan human sa nahitabo’ng insidente.
“Unsa’y mga needs ug what to do para mausab namo ang mga bata,” dugang ni Radaza.
Ang Home Care Center sa siyudad, usa ka shelter alang sa mga "children in conflict with law." Sa pagkakaron ang na-rescue nga mga minors anaa sa kustodiya sa Department of Social Welfare and Development.
Gihangop ni Radaza ang gihimo sa mga ahensya tumong nga maundang ang cyber-pornography. Mipadayag ang mayor nga mahimo’ng tabangan pa sila sa NBI tungod kay aduna pa’y mga potential nga lugar sa mga cybersex dens.
Si Kongresista Aileen Radaza sa mao’ng dakbayan nanghinaut nga masikop ang mga suspek nga nagpaluyo sa cyber sex dens ug maundang na ang mao’ng problema.
Sa laing bahin, si Police Senior Superintendent Armando Radoc, officer-in-charge sa Lapu-Lapu City Police Office, niawhag sa publiko nga mo-report sa mga ilegal nga kalihukan. (BANAT NEWS)
- Latest
