Paglikay sa disgrasya sa SRP tutukan
CEBU, Philippines - Tutukan sa mga hingtungdang ahensiya sa gobiyerno ang paglikay sa disgrasya sa mga sakyanan sa South Road Properties (SRP).
Kini ang tumong sa tigum tali sa kadagkuan sa Land Transportation Office, Land Transportation Franchising and Regulatory Board, Mobile Patrol Group, SRP Management ug Cebu City Transportation Office niadto’ng Biyernes.
Matud ni CCTO executive officer, Atty. Rey Gealon, nga multi-agency sila tungod kay dili lang sa traffic lakip na sa seguridad sa lugar ang ila’ng atimanon.
Atol sa tigum natuki ang mga nag-una’ng panginahanglanon sama sa pagbutang og rumble strips aron makamatngon ang mga driver nga magduka labi na sa taas nga wanang sa dalan.
Ang Task Force nga pangulohan ni Gealon nagkinahanglan usab og speed gun aron mahibaw-an ang manobra sa kusog nga dagan lakip na sa liquor analyzer aron masuta kung ubos ba sa ilimnong makahubog ang driver.
Si Gealon malaumon nga makabaton sila og towing truck aron dali makuha ang sakyanan nga madisgrasya.
Pangindahay sa Task Force nga mahatagan sila sa konseho sa dakbayan sa Sugbo sa mga panginahanglanon.
Ang Task Force magtagbo matag una’ng Miyerkules sa buwan. (BANAT NEWS)
- Latest
