Gidunggab sa babayeng iyang gibuwagan

CEBU, Philippines - Gumikan sa iyang kalagot nga gibulagan sa iyang hinigugma, gidunggab sa usa ka babaye nga minyo ang iyang kanhi hinigugmang guwardiya samtang kini natulog sa iyang gibantayang luna sa Salinas Drive, Brgy. Lahug ning dakbayan sa Sugbo pasado alas-3 sa miaging kaadlawon. Ang biktima giila nga si Ronnie Ongue, 47, sakop sa GDS Security Agency nga taga V. Rama Avenue, Brgy. Calamba dinhi sa siyudad.

Samtang ang suspek mao si Mae Parsomala, 36, taga Pulangbato ning dakbayan sa Sugbo.

Matud pa ni Police Officer 1 Joel Zamora sa Homicide Section sa Cebu City Police Office nga nahinabi sa Banat News nga samtang nakatagpilaw ang biktima sa  gibantayan niining lote miabot ang suspek nga nagbitbit og kutsilyo. Swerte nga nabantayan sa biktima sa pagbuka sa iyang mata nga kutsilyo na ang nagpaingon kaniya ug iyaha kining nasagang apan nasamad iyang bukton, kamot ug naigo gihapon kini sa tiyan.

Dali ‘sab nga misibat sa lugar ang babaye samtang nagpakitabang dayon sa iyang supervisor ang biktima ug gidala sa Perpetual Soccuor Hospital.

Ang guwardiya nga nahinabi sa kapulisan mitug-an nga wala kini laing nakita nga motibo nganong gusto kining patyon sa suspek kondili, nasuko kini nga iyang gibuwagan. Sigun pa ni Zamora nga posibleng nasakitan ang babaye sa pagbulag sa lalaki nga nagtuo nga kini unongan hangtod sa katapusan.

Kasong frustrated murder ang ipasaka sa kapulisan batok sa suspek nga padayon pa nga gipangita sa kapulisan. (Jojo Ugdol/EIM)(BANAT NEWS)