Panadero nang-hostage

CEBU, Philippines - Gitanggong sa Fuente Police Station ang usa ka panadero human gipasanginlan nga nang-hostage sa iya’ng kauban nga tindera sa bakeshop sa dalan B. Rodriguez, Sambag II, dakbayan sa Sugbo pasado ala una sa nakalabay nga kadlawon.

Ang suspek naila nga si Aldrin Gadapan, 22, ulitawo nga lumad nga taga dakbayan sa Iligan, samtang ang nireklamo’ng tindera mao si Jenelyn Melencion, 22, dalaga, pareho’ng nagpuyo mismo sa Cresty Bakeshop.

Matud ni Police Officer 1 Christian Rollon, desk officer sa Fuente Police Station, nga ang biktima nipasangil nga gikandaduhan siya sulod sa ila’ng lawak ug ang mga kauban sa biktima mao na’y nitawag og tabang sa kapolisan.

Ang suspek nihimakak ug niingon nga kuyog pa sila nga nag-inom sa reklamante ug natingala na lang nga niabot na ang mga polis ug siya gidakop.

Matud ni Gadapan nga igo ra niya’ng gidepensahan sa mga bugoy nga buot mopatay nila hinungdan iya’ng gialihan ang pultahan ug wala usab niya tioni og kutsilyo

Sumala pa ni Gadapan nga nakagamit siya og ginadili nga drugas pero dili kanunay ug ang katapusan niya’ng gamit niadto pa’ng nilabay nga mga adlaw.

Si Gadapan nanawagan sa iya’ng kauban nga pasayloon lang siya tungod kay managhigala man sila ug igo ra siya’ng nidepensa sa ilang kaugalingon sa mga tawo nga buot mopatay kanila.

Kasong illegal detention ug coercion ang gikatakda’ng ipasaka sa dalaga batok sa ulitawo. - /GMR (BANAT NEWS)