12-anyos naghikog kay gikasab-an
CEBU, Philippines – Lain na usab estudyante ug ning tungora usa ka 12-anyos nga tinun-an sa elementary ang naghikog human gikatahong nahiubos dihang gikasab-an sa inahan tungod kay nadugay og pauli. Ang bata matud pa nalangay pag-uli gumikan sa graduation practice sa ilahang tunghaan didto sa Barangay Basak dakbayan sa Lapu-Lapu kagahapon sa hapon.
Si Police Officer 3 Alexander Septimo, imbestigador sa Lapu-Lapu City Police Office-Homicide Section nagkanayon nga napalgang nagbitay ang 12 anyos nga dalagita sa ikaduhang andana sa ilahang panimalay sa Sitio Eskwelahan sa nahisgutang barangay.
Base sa inisyal nga imbestigasyon, gikan og graduation rehearsal ang bata ug nauli alas- 9 sa Lunes sa gabii, matud pa nasuko ang inahan tungod kay nasayran niini nga hapon pa nahuman ang practice.
Nagtungha ang 12 anyos ngadto sa Basak Elementary School sa maong dakbayan. Si Septimo midugang nga sa wala pa naghikog ang menor de edad, naglalis na ang bata ug iyahang inahan ug mibahad nga molayas.
Pasado ala una niadtong hapon, ang bilas sa namatay maoy nakakaplag niini nga nagbitay na gikan sa usa ka improvised nga duyan.
Dali kining gidala sa Lapu-Lapu City District Hospital apan gideklarar na kini og dead on arrival. Ang 12-anyos ang kinamanghuran sa napulo ka magsuon. – /EIM) (BANAT NEWS)
- Latest
