Elepante mo-detect og bomba

CEBU, Philippines – Sa atong nahibaw-an, canine o K9 (iro) mao kanunay ang gamiton sa mga otoridad pagpangita og bomba o eskplosibong kahimanan o dili ba kaha mga kontrabando sama sa droga.

Apan lahi ning kalaki didto sa South Africa kay elepante man maoy usa sa ilang nahuna-hunaan nga mobuhat sa maong malisod nga tahas.

Inabagan sa U.S. Army Research Office, ilang gibansay-bansay ang mga elepante sa natad sa 'bio-detection' ug positibo kaayo ang resulta sa maong proyekto.

Sa labing bag-o nilang eksperimento, ilang gipalakaw ang 17-anyos nga lalaking elepante nga ginganlan og Chishuru sa dalan diin dunay nakalinya nga mga balde, usa niini ilang gipahiran og kemikal sa usa ka matang sa makusog nga bomba.

Isud kanunay ni Chishuru ang taas niyang ilong sa matag balde nga iyang maagian. Apan sa dihang kadto nang balde nga dunay kemikal ang iyang natungnan, kalit lang siyang mihunong dayong isa sa duha niya ka mga tiil sa atubangan.

Pila ka higayon nga ilang gibuhat ang maong pagsulay ngadto ni Chishuru apan wala g’yud kini masipyat bisan og usa ka higayon.

Dili sab labad ang maong elepante kay sama sa iro, igo lamang kini nimo pakan-on isip pahalipay sa nabuhat niining tahas. Sa kaso ni Chishuru, lawgan lamang nila kini og  marula, usa ka klase sa prutas nga kinaham kaayong kan-on sa mga elepante. Gikan sa www.telegraph.co.uk/EIM)