Text to the Mayor Hotline gitagad

CEBU, Philippines - Gitagad ang mga reklamo nga gipadangat sa Text to the Mayor Hotline sa dakbayan sa Talisay gikan sa mga residente.

Matud ni Christopher Estrabon, usa sa sinaligan sa buhatan ni Mayor Johnny Delos Reyes sa pag-atiman sa hotline, nga confidential ang mga impormasyon nga ilang madawat.

Gani gidasig ni Estrabon ang mga Talisaynon nga mopahimulos sa Text to the Mayor aron matubag ang ilang mga sumbong.

Sagad sa reklamo mao ang nagtapun-og nga mga basura sa barangay nga wala matagad lakip na ang mga sumbong sa pipila ka mga kawani sa Talisay nga ligoy sa ilang trabaho.

Matud ni Estrabon nga ang Text to the Mayor Hotline nakatabang usab sa pag-report sa kapolisan sa mga kadudahan og  lihok nga mga tawo nga posible’ng hulga sa seguridad sa publiko.

Giklaro ni Estrabon nga sa matag madawat nga text sa usa ka concerned citizen ila dayun i-verify ang mensahe ug himoan og report ug ipasa sa hingtundan nga buhatan.

Dili malikayan ang binuang nga text message apan sumala ni Estrabon nga mahibaw-an na nila sa entrada pa lang sa mensahe. (BANAT NEWS)