67 ka sunog sa Talisay sukad Enero
CEBU, Philippines – Nikabat na sa 67 ka sunog ang gitubag sa Talisay City Fire Department sukad Enero hangtud Pebrero niini’ng tuiga. Matud ni City Fire Marshall Randy Mendaros nga mayoriya sa mga sunog nagsugod sa octopus connection kun nagtampunsisok nga linya sa kuryete sa usa lang ka saksakanan hinungdan sa overloading.
Kini sagad mahitabo sa mga balay sa mga sikit-sikit nga lugar nga pulos nagkabit lang sa ilang silingan nga kuryente. Niini’ng pagsaulog sa Fire Prevention Month, gipangapod-apod sa kabomberohan ang mga leaflets sa mga pamaagi aron kalikayan ang sunog ug numero sa telepono nga tawagan kun adunay sunog.
Usa sa pahimangno ni Mendaros sa publiko nga minusan ang overloading aron dili mo-spark nga moresulta sa sunog.
Giawhag usab ni Mendaros ang publiko nga adto lang sa mga accredited nga electrician modangop kung may ipahimo nga electrical wiring connection aron safety ang pag-tap sa kuryente. – /GMR) (BANAT NEWS)
- Latest
