Babaye gigapos og alambre, gisud sako

CEBU, Philippines – Paingon na sa pagkadugta ang lawas, duna’y bangag sa iyang ulo, gigapos og alambre ang tiil ug gisulod sa sako ang usa ka babaye nga nakitang naglutaw sa kadagatan sa lungsod sa San Fernando.

Ang maong babaye nagsuot og blue nga t-shirts, nakamaong nga pantalon ug pink ang underwear, taas og buhok ug gibanabana nga anaa sa 5’3 ang gitas-on.

Matud pa ni Police Officer 1 Erwin Oyao sa San Fernando Police nga nahinabi sa Banat News dili na maila ang dagway sa maong babaye.

Gawas sa bangag sa kilid sa iyang ulo, wa pa mahibaw-i kun duna pa ba kini laing mga bun-og sa ilang lawas. Ang lawas sa babaye gikatakdang ipa-awtopsiya aron pagtino sa gikamatyan niini. Sumala pa ni Oyao nga usa ka barangay tanod ang mitaho sa ilang buhatan ma’y labot sa maong patay nga lawas human kini nakit-an sa mga residente.

Ang sako nga gisudlan sa maong babaye duna’y naka marka nga daw sa dili gikan sa Pilipinas ug kini gisubay na sa kapulisan kun asa gikan.

Usa sa ilang gisubay karon kung manakayay og barko ang maong babaye kay duna ma’y mga barko nga langyaw nga nag-angkorahe sa maong lugar.

“Usa pud na sa atong tan-awon kay wala man g’yud ‘ta’y guide kinsay naghimo ani, unya sa dagat man ni siya nakita,” matud pa ni Oyao.

Hinuon wala gipadaplin sa kapulisan ang posibilidad nga gipatay kini sa laing lugar ug gilabay sa dagat hangtud gianod sa maong dapit.

Ang patay nga lawas ang anaa karon gipahimutang sa Saint Francis Funeral Homes sa N. Bacalso Avenue ning dakbayan sa Sugbo. – /EIM) (BANAT NEWS)