P50 mil nga shabu nasakmit
CEBU, Philippines – Dul-an P50 mil nga drugas ang nasakmit sa kapulisan gikan sa usa ka gipasanginlang tigpayuhot og drugas atol sa pagpangronda sa kapulisan sa Barangay Bagasawe lungsod sa Tuburan.
Ang dinakpan naila nga si Wilfredo Talaugon, alyas Wilfredo San Juan, 57, nagpuyo sa maong lugar.
Matud pa ni Police Officer 3 Roberto Rondina sa Tuburan Police nga nahinabi sa Banat News kini mitug-an nga usa ka level 3 drug pusher ang dinakpan nga taudtaod na ‘sab nga gisundan sa kapulisan.
Pasado alas-6 sa buntag sa dihang gihimo ang buy-bust operation ug napalitan kini og usa ka gamay nga pakete nga gituohang shabu nga nagkantidad og P300.
Ang hepe sa Tuburan Police nga si Senior Inspector William Homoc mao sa’y nangulo sa maong operasyon bitbit ang usa ka search warrant nga giisyu ni RTC Judge Hermes Montero sa Branch 59 sa dakbayan sa Toledo.
Nakuha sa kapulisan gikan sa panimalay sa suspetsado ang usa ka medium size ug upat ka gagmay nga pakete sa gituohang drugas ug drug paraphernalia.
Hinuon matud pa sa kapulisan nga atol sa ilang pagsilbi sa maong search warrant wala ‘sab mipakita ug pagsukol sa mga polis ang suspetsado. – /EIM) (BANAT NEWS)
- Latest
