Kenyan gikulata sa mga istambay

CEBU, Philippines – Nalandig sa tambalanan ang usa ka Kenyan human gikulata sa mga nag-inom nga istambay sa Kauswagan Road, Talamban alas 3:50 sa nakalabay nga kadlawon.

Ang biktima naila nga si Francis Muongela Kakui, 39, ulitawo ug temporaryo nga nagpuyo sa San Jose, dakbayan sa Sugbo. Matud ni PO1 Gringo Muldez, desk officer sa Talamban Police, nga posible’ng na-tripan ang biktima.

Paingon na unta mouli sa iyang gipuy-an ang biktima diha’ng nalabyan ang lima ka lalaki ug duha ka babaye nga nag-inom sa maong lugar.

Usa sa mga lalaki ang kalit lang milipot sa likod ug dayon sumbag ug ang uban nga lalaki nitabang pa og kulata.

Human sa hitabo dali nga naglumbaanay og dagan ang mga lalaki. – /GMR) (BANAT NEWS)