P400t nga shabu nasakmit, 7 sikop, 2 sibat

CEBU, Philippines - Nasakmit sa mga sakop sa San Nicolas Police Station ang kapin sa P300 mil nga kantidad sa ilegal nga drugas dihang gi-served ang duha ka search warrant kagahapon sa buntag sa barangay Suba, dakbayan sa Sugbo.

Nasikop si Lourdes Mata, 45, taga dalan Garfield, barangay Suba ug ang iyang kapuyo nga si Fernando Español, 43.

Nakuha gikan sa balay sa manag-live-in ang tulo ka medium sized nga pakete sa shabu nga mobalor og kapin  sa P150 mil.

Nakuhaan sab og usa ka kalibre .38 nga revolver si Español human wala nakapakita og papales sa maong armas.

Samtang nakaeskapo ang usa ka Mary Grace Abellana, taga dalan Concepcion, barangay Suba atol sa pag-serve sa search warrant pasado alas 11:00 kagahapon sa buntag.

Apan ang mga polis naka-embargo og 67 ka gagmay nga pakete nga shabu gikan sa balay sa suspek nga mobalor og P153,400 ug ubay-ubay nga drug paraphernalia.

Samtang nasikop sa mga sakop sa Provincial Intelligence Branch ang upat ka lalaki apan naka-ipsot ang subject sa buy-bust operation nga niresulta sa pagkasakmit sa kapin sa P130 mil nga shabu sa niaging gabii sa dakbayan sa Danao.

Naila ang nasikop nga sila si Jerson Cabales, 22, taga Negros Occidental; Arlito Landero, 40; Reyjoy Baco, 31, ug si Dennis Espinosa, 25, pulos taga Danao City.

Ang subject sa maong buy-bust operation nga si Michael Mangas naka-ipsot ug nikaratil og dagan.

Hiniusang operasyon gilusad sa Provincial Anti-Illegal Drugs Special Operations Task Group ug sa Provincial Investigation and Detective Branch tumong sa pagsikop kang Mangas.

Nakabantay ang suspek nga polis ang iyang gika-estorya hinungdan nga nisibat apan nasikop ang iyang mga bata-bata kinsa wala nakabantay.

Nakuha gikan sa balay sa suspek ang usa ka gamay ug duha ka daku nga pakete sa gituohang shabu nga mobalor og P130,272 ug pipila ka drug paraphernalia.

Samtang nasikop ang 20-anyos nga ulitawo nga si Gardji Englis Geronimo sa nagpatrolya’ng kapolisan sa barangay Pulpogan, lungsod sa Consolacion alas 11 pasado sa niaging gabii ug nakuhaan og shabu.

Nabungkag ang pundok sa mga batan-on dihang niagi ang team nilang Inspector Fermin Doque Jr. sakay sa ilang mobile patrol hinungdan nga ilang gisusi.

Si Geronimo nga nakalitan ang nadakpan ug nasakpan nga may dala’ng usa ka pakete’ng shabu.  (BANAT NEWS)