Kapitan gireklamo sa Youth leader

CEBU, Philippines - Usa ka 25-anyos nga lalaki ang nagpatabang sa Cebu Provincial Police Office kagahapong adlawa human kini nakadawat og mga death threats pinaagi sa text nga gituohang gikan sa usa ka barangay kapitan sa siyudad sa Naga.

Si Jimms De Gracia, youth leader midangop sa hepe sa Provincial Investigation Detective and Management Branch, Sr. Insp. Wilson Abot aron mopasaka og reklamo batok ni Lanas barangay Kapitan Rey Anoza.

Ang reklamante miingon nga nagsugod ang ilang panagbangi niadtong bulan sa Enero human nga misaad ang kapitan nga kini mao ang mohatag og premyo sa paliga sa basketball sa sitio fiesta niadtong Enero 24.

Apan pag-abot sa petsa 24 wa mohatag ang kapitan mao nga nangita kini og paagi aron dunay premyo ang ilang kalingawan, giingong gibungkag usab sa kapitan ang mga batan-on ug nagpa-eleksyon og bag-ong opisyal sa maong grupo.

Si De Gracia miingon nga ang text nga gidudahan niyang gikan sa kapitan nag-ingon nga: “Puthaw man kaha na imo lawas? Bisa’g asa ka tago makuha ra gihapon tika.”

Ang hepe sa Naga Police nga si Superintendent Brindo Nacario ug PO3 Gilmer Noval apil usab sa gireklamo ni De Gracia sa PIDMB.

Matud pa nga miadto si Noval sa ilang barangay nga nagdala sa subpoena nga gikatahong gipirmahan ni Nacario aron paadtuon siya sa presinto hinungdan sa iyang kahibulong kay siya man untay gihulga ug nganong siya na man hinuoy gipatawag.

Apan   si Nacario mihimakak nga mipirma kini og susbpoena.

Sa pakighinabi sa Banat News ni kapitan Arnoza kini sab mihimakak nga siya ang nagpadala og mga death threats kang De Gracia ug miingon nga naghimo-himo lang kini og estoya.

“Wala g’yud ‘to nako buhata, di ko mobawos ana niya. Siya’y ga-text nako nga bati kaayo which is nakaguba sa akong pagkatawo,” matud pa sa kapitan. Nagplano ang kapitan mopasaka og kaso batok  ni De Gracia tungod sa pagbalewala niini sa summon nga gipirmahan sa ilang numero uno nga konsehal sa barangay. (BANAT NEWS)