Madre nailad, kombento gikawatan

CEBU, Philippines - Maayo’ng pagkailad sa madre sa duha ka kawatan nga nidala sa usa ka laptop nga gipanag-iya sa Sogod Parish Church sa niaging adlaw.

Uwahi na nga nakamatikod si Sis. Lavinia Atuban, 37, missionary sa Sogod Parish Church nga kawatan diay ang iyang kaestorya human ilang nabantayan nga nawala na ang laptop nga kantidad og P20,000.

Matud ni PO1 Ronald Rondina, desk officer sa Sogod Police Station, nga duha ka lalaki nga nagpangedaron og 20-anyos pataas ang una’ng nagpaila sa madre nga sila mga ig-agaw sa pari sa simbahan nga si Rev. Fr. Eduardo Mercileones.

Sumala pa nga gusto nila’ng pakigkitaan ang pari kay magpatabang sila sa ilang bayranan sa tuition fee.

Sa pagtuo sa madre nga sila mga paryente sa pari, giimbitar niya ang duha nga maniudto apan nibalibad kay humana sila nangaon sa fiesta sa lungsod sa Catmon.

Sa pagbalik sa madre gikan sa kusina nahanaw na ang duha ka lalaki ug lakip sa nawala ang laptop nga gibutang sulod sa kombento. “Mao to’y ilad sa atubangan, dili pud daw kadudahan nga mangingilad og dagway ang duha,” matud ni Rondina. (BANAT NEWS)