Duha ka sunog, 2-anyos naluwas
CEBU, Philippines – Niulbo ang duha ka sunog sa dakbayan sa Sugbo niadtong Sabado sa gabii ug kagahapon sa udto sa Sitio Ginabsan, Basak-San Nicolas ug sa Sitio Abellana, Barrio Luz.
Una nga nisilaob ang balay ni Margarito Coran, sa Sitio Ginabsan, Basak-San Nicolas.
Gibanabana nga mokabat sa P5 mil ang danyos sa sunog.
Samtang kagahapon sa udto natabang ra sa mga tawo ang sunog sa balay ni Girlie Miller sa Sitio Abellana, Barrio Luz.
Matud sa mga silingan nga ila na lang nabantayan nga niulbo na ang kayo sa ikaduhang andana sa balay ni Miller hinungdan nga nagtinabangay sila aron mapawong.
Ang 2-anyos lang nga apo ang giingong nahabilin sa balay atol sa sunog hinuon naluwas ra.
Si Geraldo Calambro, kapuyo sa inahan sa bata, miingon nga dili pa lang dugay nakagawas sa hospital ang bata.
Wa pa matino sa kabomberohan kun unsa ang hinungdan sa sunog sanglit wala’y wiring ang ikaduhang andana sa balay ni Miller. – /GMR) (BANAT NEWS)
- Latest
