Traffic enforcers ‘nangilkil’ girelibohan
CEBU, Philippines - Girelibohan na ang duha ka traffic enforcers sa dakbayan sa Mandaue nga gipasanginlan nga nangilkil sa langyaw nga nakahimo og kalapasan.
Si Edwin Ermac, operation chief sa Traffic Enforcement Agency of Mandaue (TEAM), niila sa duha nga sila si Arman Gallardo ug Ringgo Pinados.
Si Gallardo ug Pinados nahimong viral sa social media ang ilang video diha’ng ilang gidakop ang wala mailhing langyaw nga drayber nga nagmaneho sa iyang sakyanan nga nihimo og U-turn sa dalan sa reclamation area.
Nagsakay sa ilang mobile patrol sila si Gallardo ug Pinados ug ilang gidakop ang langyaw.
Sa video nakita nga nagdali sa pagpanganaug ang duha ka traffic enforcers sa ilang sakyanan ug gipangayo ang lisensiya sa langyaw.
Wala hinuon nakita sa video ang pasangil nga pagpangayo og kuwarta apan nakita nga ang langyaw nga lalaki nisulod sa mobile patrol ug gituohan nga didto gihimo ang paghatag.
Sa video nipasangil ang langyaw nga nihatag og P1,500 ug giuli kaniya ang lisensiya.
Si Ermac nanawagan sa biktima sa pagpaila ug pagluwat og pinirmaha’ng pamahayag nga basehanan sa kaso batok sa duha ka traffic enforcers. (BANAT NEWS)
- Latest
