Ahente sa sigarilyo gitulis
CEBU, Philippines - Mokabat sa P98,470 ang nasakiyo sa duha ka lalaki nga nitulis sa tulo ka ahente sa sigarilyo sa barangay Jubay, lungsod sa Liloan alas 4 pasado sa hapon niadtong Martes.
Si Police Officer 3 Jesson Gayo sa Liloan Police Station niila sa tulo ka biktima nga sila si Rizalde Gonzaga, 32, taga Lawaan, dakbayan sa Talisay; John Singuran, 32, taga lungsod sa San Remigio, ug Rey Duyat, 23, taga Banilad, dakbayan sa Mandaue.
Matud ni Gayo nga nahatud sa mga kinarton nga sigarilyo ang mga biktima sa mga tindahan.
Dihang padulong sila sa ilang delivery van, kalit lang nihunong ang motorsiklo nga giluwanan sa duha ka wala hiilhing lalaki ug gitionan sila og armas dungan ang pagdeklarar nga tulis.
Si Gayo niingon nga gikuha sa duha ka tulisan ang kuwarta nga kinolekta sa mga biktima ug nagdali kini’ng nipabulhot sa pagpadagan pahilayo sa maong dapit. (BANAT NEWS)
- Latest
