Salesman ug helper gitulis, gipriso sulod sa van

CEBU, Philippines - Gikandadohan sulod sa delivery van ang ahente og sigarilyo kauban sa iyang helper human sila gitulis sa duha ka armado’ng lalaki didto sa Barangay Pitogo, Consolacion kaniadto’ng Martes sa hapon.

Si SPO1 Francisco Perez Jr. sa kapolisan sa Consolacion miila sa biktima sa pagpanulis nga sila si Tirso Lauro, 34, taga Barangay Lagtang, Talisay, ug Ramil Tolentino, 23,  ulitawo, taga Pardo, dakbayan sa Sugbo.

Matud ni SPO1 Perez nga ang ahente sa sigarilyo nga si Lauro maoy nagdala sa kinarton nga produkto sa ilang suki’ng tindahan ug sa sama nga higayon nangolekta sa bayad sa una nila’ng delivery.

Sa pagbalik ni Lauro sa ilang nag-parking nga sakyanan gikan nga naghatod og kinarton nga sigarilyo, kalit lang miabot ang duha ka armado’ng lalaki nga nagtion og armas kanila ug mideklarar nga tulis.

Matud ni SPO1 Perez nga gikuha sa mga tulisan ang shoulder bag ni Lauro nga maoy gisudlan sa duha ka cellphone ug kinolekta nga salapi nga miabot lang og P3 mil.

Si SPO1 Perez miingon nga human makuha sa mga tulisan ang shoulder bag sa biktima dali kini nga mimando ni Lauro nga pasudlon sa van diin didto usab ang iyang kauban nga nagkamada sa kinarton nga sigarilyo.

Sa paglabay sa pipila ka oras, namatikdan sa mga biktima nga namingaw na ang palibot sa maong dapit ug maoy gihimo sa mga biktima ang pagdokdok sa pultahan sa ilang delivery van.

Ang mga bata nga gikan sa tunghaan nga nahiagi sa maong lugar maoy una’ng nakadungog sa mga biktima nga nagdukdok samtang gipriso sa sulod sa delivery van mao nga ila kini’ng giablihan. (BANAT NEWS)