2 ka Papua New Guinean gipamusil

CEBU, Philippines – Nalandig sa tambalanan ang usa ka Papua New Guinean human gipusil sa mga nagtambay sa C. Padilla, San Nicolas, dakbayan sa Sugbo sa niaging kadlawon.

Ang biktima naila nga si Gamilio Kerani, 22, ulitawo, nagtungha sa kursong Marine Engineering sa usa ka unibersidad ug kasamtangan nga nagpuyo sa barangay Mambaling.

Matud ni SPO4 Alex Dacua sa homicide section sa Cebu City Police Office (CCPO) nga posibleng gipareglahan lang o na tripan sa mga bugoy-bugoy sa lugar ang maong langyaw.

Nasayran nga gikan nipalit og sigarilyo ang langyaw apan sa iyang pag-uli, iyang nalabyan ang nagtapok nga istambay ug kalit lang gipusil sa wala pa mailhing lalaki igo sa iyang nawong ug likod.

Apan bisan pa sa mga naangkon nga samad pinusilan nakahimo pa sa pagdagan ang biktima ug nakasakay og PUJ hangtud naka-uli sa iyang gipuy-an ug gidala sa iyang mga kauban sa Miller Sanitarium Hospital.

Samtang grabeng naangol ang usa ka Papua New Guinean nga tinun-an dihang nagdumili sa paghatag og kuwarta sa tulisan hinungdan nga gipusil alas 2 pasado sa niaging kadlawon sa sitio Kagudoy, Basak, dakbayan sa Lapu-Lapu.

Si PO2 Jerzon Alparito sa homicide section sa Lapu-Lapu City Police Office (LLCPO) niila sa biktima nga si Emmanuel Aloco, 22-anyos ug tinun-an sa Indiana Aerospace University ug residente sa Vista Bella Subdivision sa mao nga barangay.

Sa wala pa nahitabo ang pagpusil, ang biktima nakigtagay kuyog sa iyang higala nga si Goiye Aglua nga usa sab ka Papua New Guinean.

Matud ni Alparito nga dihang nahurot ang ilang sigarilyo  nigawas ang biktima sa ilang panimalay aron sa pag-adto sa usa ka tindahan pipila lang ka metros nga gilay-on sa ilang gipuy-an.

Nasugatan sa biktima ang wala hiilhing lalaki nga nagtion og armas dungan ang pagpangayo og kuwarta niini.

Nagdumili sa paghatag ang biktima hinungdan nga gipusil sa wala hiilhing lalaki kinsa dali nga nakasibat samtang ang biktima nakapangayo og panabang sa iyang kauban.

Ang biktima dali nga gikarga sa Emergency Rescue Unit Foundation (ERUF) nga maoy nagdala niini sa Vicente Sotto Memorial Medical Center sa dakbayan sa Sugbo. – /GMR) (BANAT NEWS)