Patay sa bagyo nakit-an sa Dalaguete

CEBU, Philippines - Patay nga lawas sa 66-anyos nga babaye nga gituohang apil sa biktima sa bagyong Seniang ang nakit-an nga naglutaw-lutaw sa kadagatan sa barangay Casay, lungsod sa Dalaguete pasado alas 8 sa nakalabay nga buntag.  Ang biktima naila nga si Macaria Revilla, taga Barangay Tubod, Sibonga, kinsa giila sa iya’ng kaparyentehan.

Sumala pa ni PO1 Roderick Maquinta, desk officer sa Dalaguete Police, nga nakit-an sa mga mananagat ang patay nga lawas ni Revilla samtang sila nanguha og mga anod nga lubi sa kadagatan.

Paingon na sa pagkadugta ang patay nga lawas ni Revilla dihang kini nakit-an sa mga mananagat.

“Layo na gyud og naabtan sir kay kung gikan sa Sibonga moagi pa man ka og Argao paingon diri, mao seguro’ng wala na siya nakita sa Sibonga,” sumala pa ni Maquinta.

Wala’y nakitang foul play ang kapolisan sa kamatayon sa biktima ug basi sa autopsy report, pagkalumos ang hinungdan sa iyang kamatayon.  (BANAT NEWS)