Puthaw nga barandilya gitaud

CEBU, Philippines - Ingon sa gipul-an na si Mayor Michael Rama tungod sa kadugay sa kadagkoan sa Technical Education Skills Development Authority (TESDA) nga isibog ang koral sa ilang compound diha sa Salinas Drive sa Lahug.

Ang tumong ni Mayor Rama mao nga kun masibog na ang koral nga semento sa TESDA gikan sa karsada, mahimong ang kadagkoan sa Department of Public Works and Highways (DPWH) makatukod og aseras aron anha ang mga tawo moagi.

Giawhag na ni Rama ang kadagkoan sa TESDA, apil na gani ang mga opisyal sa Kapitolyo, nga tabangan ang dakbayan aron pagsiguro nga dili mabutang sa peligro ang mga tawo nga moagi diha sa Salinas Drive kilid nga bahin sa TESDA.

Ang bahin sa Salinas Drive nga walay aseras mao ang kilid sa karsada gikan sa main entrance sa Waterfront Hotel & Casino paingon na sa flyover sa Archbishop Reyes Avenue.

Aron pagpaninguha nga malikayan ang aksidente, gibutangan lang usa og puthaw nga railings ang daplin sa karsada. Apan tungod sa kagamay ra sa lugar nga agianan sa mga tawo, ilabi na kun magsugat, ang mga tawo anha gihapon sa karsada molakaw.  Ang pikas bahin sa Salinas Drive nga kaniadto giukopar og kabalayan nabutangan na og aseras. Kini human nga gipugos sa DPWH ang mga tagbalay nga isibog ang ilang balay gikan sa karsada.  (BANAT NEWS)