Kaso sa dept. head sa Kapitolyo nga may kagakos sugdan og tuki

CEBU, Philippines – Tukion na sa committee on discipline and investigation (CODI) karong adlawa (Miyerkules) ang isyu sa usa ka department head sa Kapitolyo kansang hulagway nga may kagakos nga  usa ka babayeng minyo sa social media.

Si Atty. Orvi Ortega, provincial legal officer mibutyag sa mga tigbalita kagahapon nga ilakip nila sa ilang meeting karong adlawa ang kabahin sa maong isyu alang sa ilang lakang nga himuon.

Kung ugaling mapamatud-an nga dunay nahimong kalapasan ang maong department head, ang silot ipasubay sa Civil Service Law base sa nahimo niyang kalapasan.

Ning ulahi, si Gob. Hilario Davide III miingon nga kinahanglang ipaagi sa “due process of law” ang maong opisyal. Sa kawani sa gobiyerno nga usa ka minyo ug mamatud-ang nakigrelasyon og laing babaye o lalaki nakalapas kini sa Akta Republika 6713 kon “Code of Conduct and Ethical standards for Public Officials and Employees.”

Matud ni Davide nga ang labing bug-at nga silot nga makalapas niini  tangtangon sa serbisyo. – /EIM) (BANAT NEWS)