Retiradong US Marines, 4 Pinay sikop

CEBU, Philippines - Gibalhug sa prisohan ang usa ka retiradong sakop sa US Marines kauban ang upat ka Pinay human gireklamo sa tagdumala sa usa ka hotel nga gipuy-an.

Ang langyaw ug kaubanan gireklamo sa kasaba ug namuak pa sa suga sa kuwarto ug nakuhaan og mga drug paraphernalia sulod sa hotel sa may Maria Christina ug Juana Osmeña St., Capitol Site, Cebu City niadtong nakalabay nga hapon.

Ang mga dinakpan naila nga sila si Ronald Welch, 58, ulitawo, taga Colorado, USA samtang ang mga Pinay nga kauban sa lawak naila nga sila si Ritz Diez, taga Lorega-San Miguel; Merrycris Sabelano, taga Lahug; Mercy Lansang, taga Capitol Site ug Fatima Abendan, nga taga Capitol Site, dakbayan sa Sugbo.

Ang mga sakop sa alert team sa Fuente Police nga gipangulohan ni PO3 Jerry Genelaso ug kaubanan ang dali nga nakaresponde sa pakitabang gikan sa front desk sa hotel nga si Florence Vaño, 36.

Sa pagsulod sa kapolisan ilang nakita nga gikuha ug gibuak sa langyaw ang duha ka suga sa lawak ug sa pagrekisa ilang nakuha ang usa ka lighter, upat ka aluminum tin foil nga gigamit isip tooter ug usa ka improvised tube.

Kasong paghupot og drug paraphernalia ug alarm and scandal ang atubangon sa langyaw samtang kasong alarm and scandal ang ipasaka sab sa upat ka Pinay. (BANAT NEWS)