Pagkolekta og basura sa Toledo i-privatized

CEBU, Philippines - Adunay plano ang kagamhanan sa dakbayan sa Toledo nga itugyan na sa pribado’ng kompaniya ang pagpangolekta og basura sa siyudad.

Kini ang gipahibalo ni Rex Ybañez, officer-in-charge sa Public Service Division sa Toledo City Hall, atol sa gipahigayon nga tigum sa mga kawani sa maong buhatan.

Dugang ni Ybañez nga pribado’ng garbage truck og kolektor mao nay manguha sa mga basura sa siyudad. Pagka karon gihuwat pa ang resulta sa pagpahigayon og bidding.

Wala gibutyag sa maong opisyal kun pila ang gitagana nga budget sa kagamhanan alang sa maong katuyoan.

Samtang gisiguro ni Ybañez nga dili maapektohan ang mga kaswal nga kawani ug ang job order workers kay magpabilin gihapon sila nga makatrabaho pinaagi sa pagpanilhig sa kadalanan sa siyudad. (BANAT NEWS)