P19.1B budget gilaumang itugot sa konseho

CEBU, Philippines – Gipresentar na sa local finance committee sa siyudad sa Sugbo kun asa mahimong makuha ang P19.1 bilyones nga budget sa sunod tuig.

Usa niini ang pagbaligya og mga lote sa South Road Properties nga gibanabanang mokabat og kapin P10 bilyones ug ang saktong pagkolekta sa mga buhis sa siyudad.

Si kanhi konsehal Jose Daluz III miingon nga daghang negosyante ang nagtinguha nga mopalit sa SRP.

Malaumon si City Administrator Lucelle Mercado nga maaprobahan sa konseho ang maong budget tungod kay nagtoo sila nga mao kini ang gikinahanglan sa mga tawo. Gibahin kaupat ang maong budget: Social, Environment, Economic ug governance.  Prayoridad niini ang pagpatukod sa Cebu City Medical Center tungod kay gikinahanglan kini nga masugdan pagtukod sa sunod tuig. Ang problema sa baha gahinan usab og dakong pundo.

Gilauman usab sa mayor nga sa umaabot nga 2025 maimpas na sa dakbayan ang mga utang niini aron mas mahatagan og pagtagad ang pagpalambo sa ekonomiya. – /EIM) (BANAT NEWS)