Aksidente o naghikog?

CEBU, Philippines - Patay ang usa ka policewoman trainee nga ubos sa Field Training Program (FTP) sa Cebu City Police Office samtang giimbestigar karon ang kauban niyang policewoman nga tag-iya sa armas nga nakapatay niini.

Ang maong pulis nga naigo sa dughan giila nga si Police Officer 1 Heide Garcia, 27, minyo, ug taga Talibon, Bohol ug nadestino sa Mambaling Police Station.

Samtang gikostudiya karon sa Fuente Police Station ang kauban niya nga si PO1 Cyrelle Marie Bayate, 27, nga nadestino sa Parian Police Station nga maoy tag-iya sa .9mm pistol nga nakapatay kang Garcia.

Ang insidente nahitabo sa pinuy-anan ni Bayate diha sa Sitio Asuncion, Urgelio, Barangay Sambag 1, ning dakbayan sa Sugbo kagahapon sa buntag.

Naglibog karon ang mga imbestigador tungod kay si Bayate mibutyag nga naghikog si Garcia gamit ang iyang service firearm.

Apan si Senior Police Officer 4 Rey Cuyos ang imbestigador sa Homicide Section sa CCPO sa maong kaso miingon nga ilaha pa kining imbestigahon.

Nasayran nga magbisitahan kang Bayate si Garcia ug kagahapon, samtang nag-ilis si Bayate kay paingon na unta kini mo-duty giingong nahitabo ang insidente.

Matud pa nga dunay kaestorya sa cellphone si Bayate nianang tungora ug nangutana kaniya si Garcia kun kinsay iyang kaestorya sa telepono ug giingnan siya niini nga ipa-loud speaker ang cellphone apan wa mosugot si Bayate.

Dihadiha, giingong kalit gipunit ni Garcia ang Glock 17 service firearm ni Bayate ug gition kini tumong sa iyang dughan ug gikablit.

“Miingon pa daw ni si Bayate nga ayaw bay, kay gikuha man ang armas unya gikasa,” sigun pa ni Cuyos base sa pamahayag ni Bayate.

Naigo sa dughan si Garcia nga milapos sa luyo, dali unta kining gidala sa Sacred Heart Hospital apan nakabsan sa iyang kinabuhi.

Sumala pa ni Cuyos nga nagpadayon ang ilang imbestigasyon kung naghikog ba si Garcia, tuyong gipatay o usa ka aksidente ang nahitabo.

Narekober sa mga imbestigador ang armas nga nakaigo kang Garcia samtang si Bayate gikostudiya ni Chief Inspector Wildemar Tiu, ang hepe sa Fuente Police Station. Napaubos na sa paraffin test si Bayate ug paabuton pa  ang resulta niini human sa tulo ka adlaw. (Jojo C. Ugdol/EIM)(BANAT NEWS)